Byrjaði vinnu í Fljótsdalsstöð 22 sept eftir sumarfrí, en þar gengur allt sinn vana gang og er framleiðslan Fljótsdalsstöðvar nú um 600MW.

Meðan ég var í sumarfríinu var afhjúpað og sjósett fley eitt fagurt í frárennslisskurðinum frá Fljótsdalsstöð og ber það listamanninum Ólafi Þórðarsyni fagurt vitni, listaverkið heitir Eilífðardraumurinn. Dæmi nú hver fyrir sig, það vekur í það minnsta athygli.



Hálslón er ennþá á yfirfalli og verður eitthvað fram í okt háð veðri. Ætlunin er að opna fyrir vatn frá Jökulsárveitu (Hraunaveitu) í lok næstu viku og verður þá farið að nýta vatn þaðan að hluta til á móti vatni frá Hálslóni.

Heiða er í Rvk þar sem hún hefur ekki fengið vinnu hér fyrir Austan enn sem komið er. 
 
Blíðuveður hefur verið hér síðustu viku og í dag sama sagan.

HUE

Komum heim frá London í dag um þrjúleytið og fórum beint á Landspítalan að heimsækja Sigurveigu sem ól dóttur kl 23:17 í gærkvöldi og heilsast þeim mæðgum vel. Stúlkubarnið var 52,5 cm að lengd og vóg 4150 grömm.




Annars er það að frétta af Lundúnarferðinni að hún hófst tólfta sept og lauk í dag. Byrjuðum á því úti á Heathrow að kaupa miða sem dugðu bæði í
neðanjarðarkerfið (London Underground) og strætisvagnana (London Buses) með því móti er auðvelt að ferðast þvers og kruss um Lundúnarborg án nokkura vandræða á lámarksverði.

Fórum skoðunarferð í Buckingham-Palace, en Lísa er ekki heima nú um stundir, elur mann sinn í Skotlandi, en er væntanleg til baka í lok sept, en þá verður lokað fyrir skoðunarferðir inn í höllina. Sigling á Thames var áhugaverð og tók tæpar þrjár klst.
Fór einn hring með London Eye hjólinu til að taka myndir, þar sem mjög gott veður var til myndatöku. Sagt er að hægt sé að sjá 30km radíus út frá hjólinu í góðu skyggni.

Fórum að skoða Greenwich bygginguna í London þar sem 0 lengdarbaugar eru miðaðir við.
Það var pólitískt þrætuepli milli ríkja í marga áratugi hvar 0 lengdarbaugurinn skyldi vera staðsettur.
 
Útskýring
Núllbaugur (eða Greenwich-núllbaugur) er sá lengdarbaugur sem allir aðrir lengdarbaugar jarðarinnar eru miðaðir við, hann hefur lengdargráðuna 0 og liggur í gegnum Royal Greenwich Observatory í Greenwich á Englandi. Daglínan (sem er ekki bein eins og núllbaugurinn) er svo staðsett í námunda við 180. lengdargráðu.

Saga
Ólíkt breiddargráðu er enginn náttúruleg miðlína fyrir lengdargráður á borð við miðbaug, þannig að velja þurfti viðmiðunarpunkt. Breskir landfræðingar og vísindamenn völdu að nota Greenwich, en aðrir punktar voru valdir víða um jörðina, þar á meðal Ferro, Róm, Kaupmannahöfn, Jerúsalem, St. Pétursborg, Písa, París og Philadelphia. Árið 1884 var að frumkvæði Chester A. Arthurs forseta Bandaríkjanna haldin Alþjóðleg núllbaugsráðstefna þar sem meðal annars var ákveðið að öll lönd heims skyldu nota Greenwich sem núllbaug. San Domingo (nú Dóminíska lýðveldið) greidda atkvæði á móti ályktuninni og Frakkland og Brasílía sátu hjá. Frakkland tók ekki upp Greenwich-núllbaug fyrr en 1911.

HUE

Jæja þá er allt fárið sem greip um sig þegar handboltalandsliðið vann til silfurverðlauna á Ó.L. í Kína um garð gengið. Glæsilegur árangur, einhverja hluta vegna fannst mér alltaf að þeir gætu þetta, þar sem þeir æfa og leika í sterkustu handboltadeildum í heimi og eru oft með betri leikmönnum liða sinna. (Árangurinn hlítur að vera spæling fyrir þá sem höfnuðu þjálfun landsliðsins og töldu það of lélegt til að þjálfa, en gátu t.d. tekið við þjálfun sveitadurga í Austurríki).

Einnig fannst mér frábært að styrkja handboltahreyfinguna með peningaframlögum þar sem það er eina hópíþróttin sem við Íslendingar stöndum jafnfætis þeim bestu í heiminum ( sjá t.d. fótboltann sem veður í peningum en enginn árangur næst þar sem leikmennirnir eru yfirleitt varamenn liða sinna og sitja á bekknum flesta leiki).

Samt finnst mér að sleppa hefði mátt riddarakrossum til landsliðssins (finnst það hallærislegt), ákvörðun sem tekin er af Forseta Íslands í einhverju tilfinningaflippi í íþróttahöll í Kína þegar hann fagnar sigri í einum af leikjum landsliðsins (bara bull).

Annars er allt gott að frétta er í sumarfríi nú um stundir, var í palla og skjólveggjasmíði sem nú er lokið.

Utanlandsferð í bígerð, en Heiða vill ekki fara fyrr en Sigurveig hefur orðil léttari, sem áætlað er fyrir miðjan mánuðinn.

HUE